توتة توتة

حبايب قلب بابا جدوالصغار الحلوين بكتب لكم اليوم حدوتة طفل أسمه يوسف كان عايش مع باباه ومامته فى بيت وله جنينة وكان باباه ومماته بشتغلوا، وكل يوم الصبح يروحوا شغلهم وكانت مامته كل يوم قبل ماتروح الشغل تقول ليوسف ماتفتحش الباب لأي حد يخبط عليك علشان الحرامية والناس الوحشين وعلشان يوسف كان ولد مؤدب وبيسمع الكلام كان بيقول لمامته حاضرولما باباه ومامته بيرجعوا من الشغل ويتغدوا كان يوسف يستأذن باباه يلعب مع أصحابه من ولاد الجيران وفي يوم من الأيام سمع يوسف صاحبه سمير بيقول تعالوا نتفرج على الست العجوزة اللى موش قادرة تمشي اللي ساكنة آخر الشارع وجري هو وأصحابه ناحية بيت له سور خشب وعند السور الخشبي وقفوا يبصوا على البيت ، وفجأة الباب بتاع البيت أتفتح وخرجت ست عجوزة ما سكة في أيدها عصاية عمالة تمشي عليها وضهرها محني من شدة الكبر، وماسكة في الأيد التانية طبق كبير، والعجيبة أن أول الست ماخرجت من الباب لقينا حمام كتير عمال يطير حواليها ويقف على أكتافها وراسها وعمال ينزل ياكل من الطبق اللى الست مسكاه منظر كان شكله حلو قوي ، سمير صاحب يوسف لما شاف المنظر ده قعد يضحك ويعيب على الست العجوزة وعلى شكلها ، الست العجوزة لما سمعت ضحك الأطفال راحت بصه ناحيتهم راحو الأطفال جاريين وهم عمالين يضحكوا ويقولوا العجوزة أهى ويغظوها لأنها بتجري ببطء وموش حتقدر تحصلهم  ، لكن يوسف  الوحيد اللى فضل واقف مكانه وهو زعلان من أصحابه، راح يوسف لبيته وحكى لمامته الحكاية،  فرحت مامته  بيوسف علشان ماعملش غلط زى أصحابه وفي اليوم التانى راح يوسف لأصحابه وسألهم ليه أنتم بتعيبوا على الست دي ؟ الست دى طيبة وعندها رحمة بالطيوروبكرة كلنا حنكبر ومنقدرش نمشي زيها،  وراح يوسف يتفرج على المنظر بتاع الحمام من تانى عند الست العجوزة ، لكن الست العجوزة ماخرجتش من البيت وفضل مستني ومستني لكنها ماخرجتش،  فكر يوسف أنه يدخل ويطمن على الست العجوزة راح داخل على باب بيتها وخبط على الباب اللى أتفتح لوحده بدأ يوسف ينده ويقول فيه حد هنا…. فيه حد هنا من غير ما يسمع أي رد دخل خطوتين وبص يمين وشمال لقى العجوزة نايمة على السرير بتتألم من شدة المرض راح جارى يوسف على بيتهم وهو بينده على باباه ومامته وبيقول ألحقوا الست العجوزة ولما عرف باباه أنه دخل بيت العجوزة بدون أذن زعل منه وقاله ماكنش يصح ندخل بيت حد من غير مانستأذن لكن نأجل الكلام ده علشان نلحق العجوزة  . جري بابا يوسف ومامته على بيت الست العجوزة ولما شافوها في حالة مرض شديد طلبوا عربية الأسعاف اللى جت بسرعة وخدتها على المستشفى وبسرعة جروا الأطباء وكشفوا على الست العجوزة وأدوها الدواء،  وبفضل عنايتهم بيها وبعناية الله سبحانه وتعالى خفت الست ورجعت بيتها وكان يوسف كل يوم بيزورها ولما سمير وعادل وحسين شافوا يوسف وهو بيزور الست كل يوم زعلوا من اللى كانوا بيعملوه وراحو أستأذنوا باباهم ومامتهم علشان يعملوا زى يوسف وراحوا هم وباباهم ومامتهم وزاروا الست العجوزة وعرفوا أنها ست طيبة وحنونة، وأتحول ضحك الأطفال ومعايبتهم عليهاالأطفال الى حب وعطف ورحمة وخدمة ، وبدأ يوسف وسمير وعادل وحسين يشاركوا الست الطيبة أطعام الحمام .

القصة دي بتعلمنا فضيلة الأدب وعدم الكلام فى حق الغير ( التعييب ) وكمان الخدمة

يتفضل حضرة بهاء الله: (ياابن الروح ) لا تفتخر على المسكين بافتخار نفسك لاني أمشي قدامه وأراك في سوء حالك وألعن عليك الى الأبد .

(ياابن الوجود) كيف نسيت عيوب نفسك واشتغلت بعيوب عبادي من كان على ذلك عليه لعنة مني .