توتة توتة

القصة دي عن حضرة عبد البهاء الذي كان رمز العطاء والصفاء والكرم وكل الفضائل الأنسانية والنهاردة بمناسبة ذكراه نذكر قصة عن حضرته :

في أحد الليالي جلس حضرة عبد البهاء وأسرته يتناولون العشاء ، وفجأة دق الباب .فمن كان الطارق ؟ لقد وجدوا طفلا صغيرا يقف في الخارج ويبدو عليه مظاهر الضعف والجوع، فماذا فعل حضرة عبد البهاء ؟؟ لقد وقف حضرته فورا ووضع الخبز والفاكهة وبقية العشاء في سلة وأعطاها للطفل الفقير ليأخذها  إلى أسرته ،  ثم قال حضرته لأسرته ليس من المهم أن نتناول نحن العشاء هذه الليلة فلقد تناولناه أمس وسوف نتناوله غدا .

هكذا كان كرم وعطاء حضرة عبد البهاء فقد كان عطوف على الفقراء والمساكين والمرضى حتى أسموه أبو الفقراء . 

كان فيه واحد أسمه عم حسنين عايش في قرية صغيرة ، كان عنده طاحونة هوائية تطحن للناس القمح والشعير والذرة لمدة40 سنة ، وفي يوم من الأيام حضر للبلد بتاعتهم رجل غريب وعمل طاحونة جديدة بس بتشتغل بقوة البخار وطبعا كانت بتطحن الحبوب أسرع وأحسن من طواحين الهواء اللى كانت بطيئة جدا، مع الوقت الناس فضلت الطاحونة الجديدة عن طاحونة العم حسنين ، حزن العم حسنين جدا علشام ماعدش بيطحن الحبوب وماعدش حد من أهل القريه بيجيله وحبس  نفسه في الطاحونة وبقي لايتعامل مع أهل القرية ولا يرحب بصحبتهم  زى زمان لما كانوا بيجوا يقعدوا معاه حتى حفيدته فوزية كمان اللي كان مربيها وبيحبها خالص كان عاوزها تدور على شغل في مكان تاني غير الطاحونة وفعلا راحت أشتغلت في مزرعة قريبة علشان تطمن بنفسها على عم حسنين وهو كمان علشان كان متعلق بيها كان بيروح لها المزرعة لوقت قصير يطمن فيه عليها . طبعا الناس كلها أتحولت من عند عم حسنين وبقت تروح للطاحونة الجديدة ولكنهم كانوا ديما يستغربوا لما يشوفوا أن طاحونة عم حسنين عمالة تدور ليل ونهار ومابتتوقفش ولما كان حد يسأله أخبار الشغل أيه كان يرد الشغل عال العال وأنا باطحن وباصدر بره كمان .                                                            

 أتعرفت فوزية حفيدته على شاب طيب في المزرعة وطلب أنه يخطبها فقالت له تعالى أخطبني من جدي في الطاحونة ، وافق الشاب وراحوا سوا عند الطاحونة وفضلوا يخبطوا الباب لكن ماحدش فتح ، قلقوا جامد على جدهم وخافوا يكون جرى له حاجة فجابوا سلم طويل وطلعوا عليه وبصوا من الشباك وكانت المفاجأة ؟؟؟؟؟؟؟؟؟؟؟؟؟؟؟؟؟؟؟؟؟؟؟

الطاحونة مفيهاش ولا كيس من أكياس الحبوب ولا أي أثر للحبوب ، فهمت فوزية أن جدها كان بيشغل الطاحونة ليل نهار علشان يوهم أهل القرية أن الطاحونة شغالة ، وده لأنه عنده عزة نفس وكرامة خلته ماحبش أنه يكون مصدر شفقة من الناس اللى حبهم طول عمره ، أتأثرت فوزية هى وخطيبها خالص لما شافت كده وبكت على حال جدها وقررت أنها تحكي لأهل القرية حكاية جدها

رجع عم حسنين بالليل ولما شاف السلم الخشبي عرف أن أهل القرية عرفوا سره وبات الليل وهو حزين أن سره أنكشف . وفي الصباح صحي عم حسنين على أصوات جميلة جاية من بعيد وعمالة تغني الأغاني اللي أتعود أهل القرية أنهم يغنوها وهم بيطحنوا حبوبهم ، بص عم حسنين من الشباك فشاف صف من العربيات المحملة بالحبوب تقرب من الطاحونة وكانوا عمالين ينادوا تعالى ياعم حسنين أطحن لنا الحبوب ، ضحك عم حسنين وفتح بوابة الطاحونة على آخرها وقال لهم أهلا بيكم أهلا نورتوا الطاحونة وحشتوني أنتم وحبوبكم  وقعد يساعدهم في نقل الحبوب للداخل  .

لما رآى أهل القرية فرحة عم حسنين بكوا وفضلوا يطحنوا جزء من الحبوب بتاعتهم عند عم حسنين لآخر يوم في عمره علشان يحسسوه قد أيه هم بيحبوه وعلشان يدخلوا في قلبه السعادة . وتوتة توتة فرغت الحدوتة حلوة ولا ملتوتة ؟ عايز أعرف رأيكم ؟

طبعا هنا ياولاد أتعلمنا فضيلة جديدة وهى ( مراعاة شعور الآخرين ) وأقعدوا مع بابا وماما علشان تتناقشوا يعني أيه أني أراعي شعور غيرى ؟

حضرة بهاء الله علمنا أزاي نراعي شعور غيرنا وتعالوا معايا نقرأ الآية دي (إنا نحب أن نرى كل واحد منكم مبدأ كل خير ومشرق الصلاح بين العالمين ، آثروا أخوانكم على أنفسكم ). والى لقاء في قصة أخرى  

حبايب قلبي وروحي الصغار الحلوين طبعا لسه فاكرين أحنا وقفنا فين ؟ لما مد الأمير الشجاع أيده علشان ياخد التعويذة السحرية من رقبة المارد الجبار ، كان المارد لسه صاحي ، راح ماسك أيد الأمير قبل ماتوصل للتعويذة، وحاول أنه يقف لكن مفعول الدخان كان أقوى وراح المارد في سابع نومة،  فك الأمير أيد المارد من أيده بسرعة وراح ماسك التعويذة وشاددها من رقبة المارد وراح راجع بسرعة للحصان الطيار وفكه من الشجرة اللى كان مربوط فيها وبسرعة ركب الحصان وقاله أجرى بسرعة علشان نبعد عن مدينة الهلاك دي ، طار الحصان بالأمير وكان الأمير في الوقت ده بيفكر في اللى حصله ، وفجأة وهو راكب على الحصان وطاير شاف فوهة بركان والنار عماله تغلي فيها أفتكر أن العجوزة قالت له علشان تفك سحر الجني لازم ترمي التعويذة في نار البركان ، مسك التعويذة بسرعة وراح حادفها في النار ، بص لقى الحصان اللى هو راكبه قعد يلف في الهوا زي ما يكون دايخ ونازل بسرعة ناحية الأرض، ولما وصل للأرض وقع الأمير من على ظهر الحصان وفضل الحصان يخبط برجليه على الأرض وشهق بقوة وراح راجع لشكله الطبيعي جني في صورة أنسان ، بص الأمير للجنى وهو فرحان أنه قدر يعمل خدمة للشاب ده ، وأول سؤال سأله الأمير للشاب للجني ، أنا عاوز أعرف أيه اللي خلى والدك غضب عليك وسحرك في صورة حصان ، قال الشاب للأمير والدي ملك من ملوك الجان وكان أعطاني أوامر علشان أتعلم أزاي أكون شاب صالح ولما أكبر وأحكم بين شعبي أحكم بالعدل والأنصاف لكن كل الكلام اللى والدي قاله لي عصيته ولم أسمعه فغضب عليه وأنا عارف أني غلطت لأن الطاعة مطلوبة وخصوصا طاعة الأبن لأبيه وعلشان كده أول حاجة حعملها لما أوصل مملكة والدي حأروح له وأستسمحه علشان يسامحني على عدم طاعتي له. بص الجني للأمير لقاه في حزن شديد سأله أنت حزين ليه قاله أنا فرحان علشان أتفك سحرك وحزين علشان أنت مبقتش حصان وموش حلاقي حاجة توصلنى لمملكتي . ضحك الجني وقاله أنا صحيح رجعت من حصان لشاب بس ماتنساش أني جني وعندي قدرات كتيرة .أطلب وطلبك مجاب قال الأمير للجني أنا عاوز أرجع لوالدي راح الجني في الحال مصفق بأيده وفي لحظات كان الأمير أمام قصر والده ، وجري الأمير ودخل القصر وهو فرحان وأترمى في أحضان والده ووالدته وقعد يحكي لهم الحكاية من ساعة ماخرج من القصر لغاية مارجع وبعد ماأنتهى الأمير من حكايته ، قال الملك لأبنه أزاي حنروح لعمك وبنت عمك والطريق طويل وشاق، وكان الجني واقف بيبص للأمير وهو بيسمع الحكاية وكان متأثر ، شاف الأمير وهو بيبصله وفهم أنه عاوز يطلب منه طلب. وقبل ما يطلب. كان الجني أحضر عم الأمير وزوجته وبنت عمه عندهم في القصر ، أتقابل الأخوات مع بعض بالأحضان والدموع وفي الحال أمر الملك بتعليق الزينات والأنوار، وتزوج الأمير من بنت عمه الأميرة، وأقيمت الأفراح والليالي الملاح أربعين ليلة وكان الجني في ضيافة الملك والأمير الشاب . وراح الجني للأمير وشكره أنه ساعده في فك سحره وأستأذنه هو والملك علشان يرجع لمملكته هو كمان ، وودع الجني الجميع، وبكده تكون رحلة الأمير أنتهت بعد ماأتعلم خلالها الكثير من الفضائل اللى حتساعده وهو بيحكم بلده وتوتة فرغت الحدوتة .  

من القصة دي نتعلم فضيلة جديدة وهى التسامح لأن التسامح بيقرب بين الناس والحبايب لكن الخصام  بيجلب الفراق والبعد  يعني لو كان الأخوات سامحوا بعض من الأول ماكنش حصل الفراق والبعد لمدة 30 سنه . من النهاردة اللى مخاصم حد يروح ويصالحه لأن حضرة بهاء الله أمرنا بأننا لازم نكون متسامحين علشان نعيش في سلام ومحبة .    

أوعى تزعل منك حد           أوعى تخلي دموع ع الخد                         خلي قلبك بستان راحة         حب وفرحة وخير وسماحة                        سامح مهما تكون زعلان      تلقى الفرحة فى كل مكان                          وأوعى تزعل منك حد          أوعى تخلي دموع ع الخد

أتعلم أولادي أغنيات مفيدة من خلال دروس التربية الروحانية البهائية وهم أطفال حبيت تسمعوها لأتها تتكلم عن الفضيلتين اللى أتعلمناهم من الحدوتة اللى فاتت

اول واحدة عن الطاعة :
طاعة ربنا فرض علينا
أمره ده زى النور لعنينا
كل آثاره كنوز في أيدينا
احنا عشانه صمنا وصلينا
طاعة ربنا فرض علينا
أمره ده زي النور لعنينا

التانية عن فضيلة الخدمة
نفسي أداوي جروح أصحابي واشفي كل مريض متألم
واخدم ناسي وكل اصحابي واعمل ده من غير مااتكلم
وأنشر عدل الله للناس وأنشر نوره لكل الناس
بكل الحب والأخلاص انا راح أخدم بكل حماس